Հայաստանում Հարավային տուրիստական միջանցքի կառուցման նախագծի արժեքը կկազմի մի քանի հարյուր միլիոն դոլար, հինգշաբթի լրագրողներին ասաց Ազգային մրցունակության հիմնադրամի գործադիր տնօրեն Բեկոր Փափազյանը նախագծի շնորհանդեսի շրջանակներում:
Հարավային տուրիստական միջանցքի կառուցման նախագիծն ընդգրկում է Վայոց Ձորի Արենի շրջանից ընդհուպ մինչև Սյունիքի մարզի Տաթև ու Գորիս, որը նախագծի հեղինակները՝ AECOM միջազգային ընկերության բրիտանացի փորձագետները բաժանել են հինգ փնջի՝ Եղեգնաձոր, Սիսիան, Գորիս, Տաթև, Ջերմուկ:
Ծրագրի մշակման նպատակով հիմնադրամը հատկացրել է 80 հազար ստեռլինգ:
«Նախագիծը նախատեսում է մի քանի տուրիստական կլաստերների զարգացում, որոնցից ամեն մեկը սկզբնական փուլում կիրականացվի միմյանցից անկախ, մասնավորապես, Տաթևի և Ջերմուկի աշխատանքներն արդեն իրականացվում են, մշակվել են ենթակառուցվածքների վերականգնման, ճանապարհների շինարարության նախագծերը», - ասաց Փափազյանը:
Նա նշել է, որ Հալիձորում նոր հյուրանոցի շինարարության աշխատանքներ են տարվում, Ջերմուկում այս պահին ընթանում է ներդրողների ներգրավման գործընթացը, իսկ Մոզրովի քարանձավի նախագծի հարցում բանակցություններ են ընթանում կոնկրետ ներդրողների հետ, և ամենայն հավանականությամբ մինչև տարեվերջ կսկսվի այդ նախագծի մշակումը:
Նրա խոսքերով՝ մինչև 2020 թ.-ը նախատեսվում է ծրագրեր սկսել հարավային ուղղության բոլոր կլաստերներում, արդեն սկսվել են աշխատանքները Տաթևում, և առաջիկա 5-10 տարվա ընթացքում ակտիվ տեմպերով կզարգանան նաև մնացած ուղղությունները:
Փափազյանն իբրև այլ կարևոր բաղադրիչ նշեց օրենքի կարգավիճակով այս նախագծի ընդունման անհրաժեշտությունը, ինչի կապակցությամբ  արդեն վաղվանից կառավարության հետ սկսվում են օպտիմալ լուծման որոնման աշխատանքները:
«Ծրագրի շրջանակներում նախատեսվում է հատուկ մարմին ստեղծել, որը ինքնուրույն, իրավաբանական կարգավիճակ կունենա և բաղկացած կլինի իշխանության, մասնավոր հատվածի, համայնքային կառույցների, հասարակական և բնապահպանական կազմակերպությունների ներկայացուցիչներից», - նշեց հիմնադրամի ղեկավարը:
Նրա խոսքերով՝ նոր կառույցը վետոյի իրավունք կունենա խոշոր ռազմավարական նախագծերի իրագործման վրա, իրավունք կունենա մշակել և իրականացնել զբոսաշրջության զարգացման համալիր ծրագրեր:
Ինչ վերաբերում է ներդրողների որոնմանը, ապա նրա կարծիքով՝ շատ բան կախված կլինի միջանկյալ արդյունքներց, մասնավորապես, միայն Տաթևի բաղկացուցիչն առաջիկա 3-5 տարվա ընթացքում մինչև 50 մլն դոլարի ներդրումներ է նախատեսում, իսկ Ջերմուկը՝ շուրջ 100 մլն դոլարի ներդրումներ:
Միաժամանակ նա նշեց, որ հիմնադրամը Հայաստանի կենտրոնական և հարավային շրջաններում նմանատիպ համալիր նախագծերի զուգահեռ զարգացում դեռ չի նախատեսում՝ ընդգծելով, որ մեկ ուղղության հաջող զարգացումից հետո միայն կարելի է այդ փորձը տեղափոխել այլ մարզեր: Փափազյանի խոսքերով՝ դա թույլ կտա կենտրոնացնել ռեսուրսները կոնկրետ նախագծերի իրականացման վրա:
2010 թ.-ի հոկտեմբերին Հայաստանի հարավում գործարկվել է 5,7 կմ երկարություն ունեցող «Տաթևեր» աշխարհի ամենաերկար ռևերսային ճոպանուղին: Ճոպանուղու կառուցման աշխատանքների ընդհանուր արժեքը կազմել է 13 մլն եվրո:
Ճոպանուղու կառուցումը Ազգային մրցունակության հիմնադրամի նախագիծն է, այն նշանավորեց 50 մլն դոլար ընդհանուր արժողությամբ «Տաթևի վերածնունդ» նախագծի մեկնարկը և նախատեսում է վանական համալիրի վերականգնումն ու պահպանումը, նրա վանական և ակադեմիական ավանդույթների վերածնունդը, գետի կիրճում և մերձակա վեց գյուղերում տուրիստական ապրանքի մշակումը, ինչպես նաև տուրիստական ենթակառուցվածքի զարգացումը:

Լ. Զոհրաբյան

  http://newsarmenia.ru/economy/20110421/42439026.html